《再與你共舞》
三年前，我結婚了。
在意大利，女兒出嫁時原來要跟爸爸跳舞。
倆父女都呆一呆，又是從來那種，由細到大，兩個四目交投就知大家心裡想什麼的情境。兩個硬著頭皮，心想：「跳就跳吧！」
「老豆，係咪好浪漫呢？」
「我同你媽咪拍拖都冇試過咁樣跳舞。」
「喂老豆，不過你可唔可以唔好再踩住我件婚紗呢？」
「哎呀～你係咁狂踩我對鞋我都未出聲，新買㗎嘛···」
笨手笨腳的，傻氣的，
父親用他那雙大如梳蕉嘅手攬住我；
一拐一拐的，暖暖的，
倆父女擁着第一次跳舞。
可是這一次，原來，
已經是最後一次。
細個嘅時候，戀愛大過天，
當分手時就天跌落嚟咁大件事。
人大了，
方知道原來有些事情，比天跌落嚟更可怕；
原來所謂的天跌落嚟，都只不過係蟻咬般癢。
失去了您，我再無辦法找回一個無論我幾任性、遴遴迍迍、約您出街食飯總要您等我、短暫失憶又久唔久激心激肺都無條件哋愛我嘅男人。
前幾天跟你說再見，您就是不瞅不睬。
這次的分手，比任何一次的都更無助。
那種心如刀割嘅痛，激痛點直達脊柱每一條神經，後腦赤痛得像快要撕裂。
狠狠地冷漠了我，讓您從前教我的堅忍都敵不過奪出的淚水。
從我去年回來，每每去探望您，
您都用那雙大如梳蕉的手捉緊我。
若時光可倒流，
懇請您再緊捉我的手一次，
就只一次，為什麼都那麼奢侈？
您前世的情人，
今世成為您的女兒，
來世，請讓我再與您共舞。
IG @misi_gipsy_italy
#嫁到意大利
#再與你共舞
#婚禮
#奢侈 #父親 #前世情人
#被擁抱着多溫暖
Search